Almenningssamgöngur lamaðar á Ítalíu vegna verkfalla

Almenningssamgöngur eru í lamasessi á Ítalíu vegna verkfalla. Í morgun skapaðist öngþveiti á lestar- og strætisvagnastöðvum vegna þessa.

Verkfallið, sem hófst síðdegis í gær, hefur mjög víðtæk áhrif því það eru landssamtök starfsmanna samgöngufyrirtækja sem standa að verkfallinu. Járnbrautarlestir eru stopp, jarðlestir einnig og strætisvagnar. Þá eru þúsundir ferðamanna strandaglópar því að áætlunarferðir langferðabíla hafa farið úr skorðum.

Talsmenn verkfallsmanna segja að gripið hafi verið til verkfalla vegna samninga sem eru fram undan. Verkföllin eru skipulögð þannig að þau hefjast í stærstu borgunum með fimmtán mínútna millibili. Í Róm hófst verkfallið í morgun klukkan hálfníu og fimmtán mínútunum síðar í Mílanó. Verkfallsmenn hafa ekki greint frá framhaldinu eða hve marga daga þeir ætla að vera frá vinnu. Það er því óvíst hvenær samgöngur komast aftur í samt horf á Ítalíu.