Rooney og McLaren rifust heiftarlega

Enskir fjölmiðlar fullyrða að landsliðsþjálfaranum Steve McLaren og framherjanum Wayne Rooney hafi rifist heiftarlega inni í búningsklefa eftir markalaust jafntefli Englendinga og Ísraela á laugardag. McLaren er sagður hafa húðskammað Rooney fyrir að ná ekki að skora, en Rooney svaraði þjálfara sínum fullum hálsi.

Englendingum hefur gengið afleitlega að skora mörk að undanförnu og hefur liðið aðeins skorað eitt mark í síðustu fimm leikjum. Rooney hefur farið illa með nokkur góð færi og svo virðist sem að McLaren sé búinn að fá sig fullsaddann af klúðri Rooney.

Flest dagblöðin ytra segjast hafa heimildir fyrir því að McLaren hafi sagt við Rooney að hann hafi ekki spilað vel fyrir landsliðið í þrjú ár. Hinn 21 árs gamli framherji á að hafa brugðist hinn versti við ummælum McLaren, öskrað til baka á þjálfara sinn og síðan stormað út úr búningsklefanum. Rooney var ekki ánægður með að hafa verið gerður að sökudólgnum og á að hafa bent þjálfara sínum á að það er liðið sem nái ekki að skora mörk.

McLaren gaf til kynna í gær að hann myndi hika við að breyta enska liðinu fyrir leikinn gegn Andorra á miðvikudag. “Ef leikmenn eru ekki að spila vel þá eru þeir teknir út úr liðinu. Þeir verða að standa sig og þeir vita það,” sagði McLaren. Það er því spurning hvort að Wayne Rooney þurfti að sætta sig við að sitja á bekknum á miðvikudag.