Fannst nakin og illa farin við vegarkant

Lögreglan í Danmörku fann í dag um fertuga konu nærri dauða en lífi við vegarkant við bæinn Roslev á Jótlandi. Konan var flutt á nærliggjandi sjúkrahús þar sem henni er haldið lifandi í öndunarvél. Allt bendir til þess að hún hafi verið beitt hrottalegu ofbeldi.

Málið hefur vakið óhug í Danmörku. Konan, sem er um 40 ára gömul, var nakin en föt hennar fundust skammt frá staðnum þar sem hún lá. Konan var illa farin og telur lögreglan allt benda til þess að hún hafi orðið fyrir hrottalegu ofbeldi.

Enn hefur ekki tekist staðfest hver konan er og hefur enginn verið handtekinn vegna málsins. Lögreglan hefur þó fengið nokkrar vísbendingar og þá sáu vitni tvær bifreiðar á sveimi nálægt staðnum þar sem hún fannst.