Tugir manna láta lífið í hitabylgju í Kaliforníu

Að minnsta kosti 25 hafa látið lífið í mikilli hitabylgju sem hefur gengið yfir suðurhluta Kaliforníu í Bandaríkjunum síðustu daga. Hiti fór í fyrsta skipti í dag niður fyrir 40 gráður í Los Angeles og mælist nú 38 gráður. Rafmagnslaust varð á stórum svæðum í kjölfar hitabylgjunnar vegna mikillar rafmagnsnotkunar.

Um 55 þúsund manns voru án rafmagns í heila tvo sólarhringa en mikil notkun á loftkælingarbúnaði varð til þess að rafmagn sló út á stórum svæðum.

Fimmtán hafa látið lífið í Los Angelsborg einni vegna hitabylgjunnar þar á meðal öldruð hjón sem höfðu slökkt á loftkælingarbúnaði á heimili sínu til að spara pening. Þegar slökkviliðsmenn fundu lík hjónanna mældist hitastig í íbúðinni um 43 gráður.

Veðurfræðingar gera ráð fyrir því að hitastig muni halda áfram að lækka á næstu dögum.