Jónas hættir hjá KR Sporti

Jónas Kristinsson mun ekki sækjast eftir endurkjöri í stjórn KR Sport hf. á næsta aðalfundi félagsins.

Þetta kemur fram í yfirlýsingu frá honum sem birtist á heimasíðu KR.

„Ég, Jónas Kristinsson, hef ákveðið að sækjast ekki eftir endurkjöri í stjórn KR Sport hf. á næsta aðalfundi félagsins.

Ég hef verið í stjórn KR Sport frá 2001 og allan þann tíma hef ég verið formaður stjórnar. Áður gegndi ég ýmsum störfum fyrir KR, var í stjórn Knattspyrnudeildar félagsins í fjölmörg ár, var framkvæmdastjóri Knattspyrnudeildar árið 1997 og hef verið og er stjórnarformaður KR flugelda. Alls hef ég starfað í stjórnum fyrir KR í rétt tuttugu ár.

Á þeim tíma sem ég hef helgað krafta mína störfum fyrir félagið hefur gengið á ýmsu. KR hefur unnið marga glæsta sigra, sem hafa kostað mikla vinnu allra sem að hafa komið. Í dag er félagsleg staða KR sterk. Það er bjart framundan og umgjörð félagsins er að taka á sig sterka og ákveðna mynd.

Akademía KR hefur farið vel af stað og virðist ætla að standa undir öllum væntingum mínum og annarra sem að hafa komið. Þar æfir fjöldi ungra efnilegra leikmanna sem vonandi eiga eftir að setja svip sinn á KR á komandi árum.

Búið er að ráða Rúnar Kristinsson, sem allir vita að er bróðir minn, sem yfirmann allra knattspyrnumála hjá KR. Rúnar er sem kunnugt er að koma heim eftir langan og farsælan ferill sem atvinnumaður í knattspyrnu og er mikils vænst af honum í framgangi knattspyrnurnar hjá KR. Það er vissa mín að hann muni bæta miklu við starfið hjá KR.

Logi Ólafsson hefur verið ráðinn þjálfari næstu árin og ég geri ráð fyrir að reynsla hans gagnist okkur vel.

Þegar ég lít til baka er margs að minnast. Eftir langa eyðimerkurgöngu unnust loks sigrar í meistaraflokki karla. Fyrst bikarmeistaratitlar árin 1994 og 1995. Sigurinn á Íslandsmótinu 1999 er stærsta stundin í lífi okkar KR-inga. Síðan unnust þrír aðrir sigrar á Íslandsmótinu, árin 2000, 2002 og 2003.

Eftir tuttugu ára starf finnst mér rétt af mér að draga mig í hlé. Staða KR er sterk, það hefur orðið endurnýjun í stjórn KR sport, Akademían er virk, það er búið að taka stórar ákvarðanir fyrir meistaraflokk, uppbyggingu þjálfunnar og alla stjórn knattspyrnumála. Á þessum tímamótum finnst mér rétt að aðrir taki við því starfi sem ég hef sinnt og hefur fært mér margar ánægjustundir.

Að lokum vil ég þakka þeim hundruðum eða þúsundum KRinga sem ég hef átt samstarf við. Þar ber ekki skugga á. Ég hef ekki starfað fyrir KR af eigin hag, heldur vegna þess að félagið hefur óskað eftir starfi mínu. Þetta er búinn að vera skemmtilegur og gefandi tími sem ég þakka fyrir.

Áfram KR,

Jónas Kristinsson

Formaður KR Sport hf."