Mikið um pústra og almenna ölvun í miðborginni

Mikill erill var hjá lögreglunni á höfuðborgarsvæðinu í nótt líkt og fyrri nótt. Alls voru 25 manns teknir vegna ýmissa brota og fengu tveir að gista fangageymslur lögreglunnar. Mikið var um pústra og ölvun í miðborginni.

Samkvæmt upplýsingum frá lögreglunni á höfuðborgarsvæðinu var fólk tekið fyrir hin ótrúlegustu brot. Þar á meðal fyrir að kasta þvagi og ganga örna sinna á almannafæri. Þá voru einnig nokkrir teknir fyrir að brjóta glös og flöskur í miðborginni.

Um klukkan hálfþrjú bað maður á Lækjargötu um aðstoð lögreglu eftir að hann var laminn í höfuðið. Maðurinn fékk skurð í andlitið og var fluttur á slysadeild. Árásarmenn fundust ekki. Um hálftíma síðar barst tilkynning frá manni við veitingastað Dominos við Stórhöfða. Hafði sá orðið fyrir árás þriggja manna og hafði fengið skrámur í andlit. Hann var fluttur á slysadeild. Að sögn lögreglunnar voru árásarmennirnir á bak og burt en eitthvað er vitað um þá.

Þá barst lögreglunni beiðni um klukkan þrjú í nótt frá manni við veitingastaðinn Vínbarinn við Kirkjutorg en sá sagði að fimm manns hefðu ráðist á sig. Manninum var ekið á slysadeild en ekki lágu fyrir upplýsingar um meiðsl hans. Árásarmennirnir voru farnir þegar lögregluna bar að garði.

Laust eftir klukkan sex í morgun barst lögreglunni tilkynning um að kona á fertugsaldri lægi ofurölvi við veitingastaðinn Dubliners í Hafnarstræti. Konan var flutt á lögreglustöð og þar ákveðið að hún skyldi fara heim. Þegar lögreglukona var að vísa konunni út reif konan í hár lögreglukonunnar og skellti henni í götuna. Við það var konan handtekin og sett í fangaklefa. Ekki er vitað afhverju hún réðst á lögreglukonuna. Konan, sem einnig er tveggja barna móðir, haði verið viðskotaill og sérstaklega dónaleg að sögn lögreglunnar áður en til átakanna kom. Lögreglukonan var í aum hársverði og andliti eftir átökin.

Samkvæmt upplýsingum frá lögreglunni á höfuðborgarsvæðinu var viðbúnaður lögreglunnar í miðbænum með sama hætti og í fyrrinótt. Fjórir sérveitarmenn og fimm lögregluþjónar úr lögregluliði höfuðborgarinnar aðstoðuðu þá sem venjulega eru á eftirliti í miðborginni.