Pavarotti er látinn

Ítalski stórsöngvarinn Luciano Pavarotti lést nú í morgunsárið á heimili sínu í Modena á Ítalíu, umkringdur fjölskyldu og vinum.

Pavarotti var 71 árs að aldri. Í miðri kveðjutónleikaferð hans í júlí í fyrra greindist hann með krabbamein í brisi og gekkst í kjölfarið undir aðgerð í New York til að fjarlægja meinið. Hann kom ekki fram opinberlega aftur. Hann frestaði tónleikaferð sinni og fór til heimabæjarins Modena, að sögn til að deyja í faðmi fjölskyldunnar.

Ferill Pavarottis spannar fjörtíu ár og var hann einn söluhæsti listamaður heims. Hann öðlaðist frægð utan óperuheimsins, meðal annars með flutningi sínum á Aríuslagaranum Nessun Dorma eftir Puccini, sem var valið þemalag heimsmeistaramótsins í fótbolta 1990. Þá söng hann með fjölda poppsöngvara.

Söngvarinn vann einnig öttullega að góðgerðarmálum. Árið 2001 hlaut hann viðurkenningu frá flóttamannastofnun sameinuðu þjóðanna fyrir starf sitt í þágu flóttamanna, en hann hafði þá safnað sem samsvarar tæpum hundrað milljónum króna fyrir málefnið, meira en nokkur annar einstaklingur.

Pavarotti lætur eftir sig eiginkonu og fjórar dætur, þá yngstu fædda 2003.