Umferðarálag við þolmörk í Ártúnsbrekku

Umferð um Ártúnsbrekku í Reykjavík um háannatímann á morgnana er alveg við þolmörk þess sem vegurinn ber, að mati sérfræðings hjá framkvæmdasviði Reykjavíkurborgar. Sundabraut mun taka allt að þriðjung þeirra umferðar þegar hún verður komin í gagnið.

Með aukinni bílaeign og auknum íbúafjölda í ákveðnum úthverfum borgarinnar, hefur umferð um stofnæðar borgarinnar þyngst hröðum skrefum undanfarin ár. Þeir sem búa á Suðurnesjum, Hafnarfirði og Kópavogi og sækja vinnu eða skóla inn í vesturhluta Reykjavíkur þurfa því að ætla sér lengri tíma en áður til að komast á vinnustað.

Um átta leytið í morgun var bíll við bíl á Kringlumýrarbrautinni á leið inn í borgina. Sömu sögu var að segja í Ártúnsbrekku. Nær samfelld umferð var þaðan niður eftir allri Miklubraut vestur í bæ.

Umferðin í Ártúnsbrekku er mjög mikil á háannatímanum á morgnana. Spurningin er hvort hér sé um eðlilega þróun að ræða frá bæ í borg, eða hvort þessi hluti samgöngukerfisins sé einfaldlega sprunginn.

Ólafur Bjarnason aðstoðar sviðsstjóri hjá Framkvæmdasviði Reykjavíkurborgar segir að töluvert þurfi að gera til að auka flutningsgetu þessara leiða. Á vissum tímum á morgnana þegar allir leggi af staða á sama tíma, myndist langar raðir og það taki sinn tíma að fara þessa leið.

Ólafur segir að hver akrein í Ártúnsbrekkunni beri um 1.500 bíla á klukkustund sem þýði að þegar umferðin er hvað mest milli klukkan hálf átta og níu á morgnana sé hún alveg við þolmörk sín. Nú þegar hafi verið rætt að byggja mislæg gatnamót við Miklubraut og kringlumýrarbraut. Þá sé í umræðunni að gera stokka meðfram Lönguhlíð, sem sé einn þrengsti og erfiðasti staðurinn.

Mest munar þó um Sundabraut sem mun taka um þriðjung af þeirri umferð sem fer um Ártúnsbrekku í dag. En á morgnana þrýstist umferð úr hverfum í austurhluta borgarinnar nær öll inn á þessa einu umferðaræð. Ólafur segir að umferðin sé lítil milli sjö og hálf átta og því megi liðka til á þessu svæði ef fólk legði fyrr af stað á morgnana, fleiri í hverjum bíl og að fleiri nýttu sér strætó.

Vegfarendur voru almennt rólegir þótt umferðin gengi hægt í morgun. Einn þeirra sem fréttastofan ræddi við, Rakel Hreinsdóttir, sagðist þó vakna hálftíma fyrr á morgnana eftir að sumarleyfum lauk, til að komast tímalega í vinnuna.

Í tilkynningu frá Bílgreinasambandinu kemur fram að heildarsala á bílum í ágúst síðastliðnum var 2.141á móti 1.498 í sama mánuði í fyrra. það er aukning milli þessara águstmánaða upp á 43%. Þrátt fyrir þetta hefur heildarsala á nýjum bílum dregist saman um 11,9% fyrstu átta mánuði þessa árs, miðað við sama tímabil árið 2006.