Ahmadinejad „sannar" að ekki verði ráðist inn í Íran

Mahmoud Ahmadinejad forseti Írans segist þess fullviss að Bandaríkin muni ekki ráðast inn í landið þrátt fyrir sögusagnir um að slík aðgerð sé yfirvofandi. Hann vísar í hæfileika sína sem verkfræðings og staðfasta trú á orð guðs máli sínu til stuðnings.

Ahmadinejad sagði hópi menntamanna sem hann ávarpaði á dögunum að ákveðin efasemdaöfl innan landsins þrýstu á að fallist yrði á málamiðlun í kjarnorkudeilu Írana og Bandaríkjanna, af ótta við að Bandaríkin réðust inn í landið.

Hann hefði hinsvegarkomist að þeirri niðurstöðu að Bandaríkin þyrðu því aldrei og fært fyrir því tvenn rök, að sögn íranskra fjölmiðla.

Annarsvegar sagði Ahmadinejad að hann væri verkfræðingur, og sérfróður í stærðfræði og útreikningum. Hann hefði velt málinu fyrir sér á alla kanta. Teiknað töflur, skrifað upp mismunandi tilgátur og komist að þeirri niðurstöðu að Bandaríkin yrðu ekki til vandræða.

Hin rök hins heittrúða forseta voru þau að hann tryði því sem guð segir.

,,Guð segir að þeir sem fylgi vegi hans muni hafa sigur. Hvaða mögulegu ástæðu getið þið haft til að trúa því að hann efni ekki loforð sín?" sagði Ahmadinejad