Grikkir sækja bætur vegna eldanna

Þúsundir Grikkja streymdu í banka í landinu í gær til að sækja bætur frá ríkisstjórninni vegna eldanna sem hafa geysað þar í landi undanfarna daga.

Allir Grikkir geta fengið bætur, sýni þeir skilríki og skrifi undir yfirlýsingu um að þeir hafi orðið fyrir tjóni vegna eldanna.

Í gær afhentu bankar meira en 24 milljónir evra í bætur, og vonast stjórnvöld til að það sýni að þau séu fær um að bregðast við hörmungunum. Margir segja að að þær séu þær verstu sem landið hefur orðið fyrir frá því Tyrkneski herinn réðst inn á Pelopskaga þegar Grikkir börðust fyrir sjálfstæði frá Ottoman veldinu árið 1825.

Stjórnvöld segja að farið verði yfir bótakröfurnar seinna, en gagnrýnendur segja að framkvæmd bótagreiðslanna bjóði heim hættu á því að fólk svíki út úr sjóðunum.

Grísk stjórnvöld hafa verið harðlega gagnrýnd fyrir að bregðast seint og illa við eldunum. Fleiri en tíu þúsund manns söfnuðust saman fyrir utan þinghúsið í Aþenu í gær til að mótmæla vegna eldanna, sem 64 hafa látist í undanfarna sex daga. Mótmælendur báru skilti sem fordæmdu brennuvargana.

Flest bendir til að eldarnir hafa kviknað af mannavöldum. Sex hafa verið kærðir fyrir íkveikjur, en sjaldgæft er að fólk sé dæmt fyrir þær. Þeir sem tekist hefur að sakfella hafa yfirleitt kveikt í til að hefna sín á nágrönnum, svindla á tryggingum eða hreinsa landsvæði til beitar.

275 þúsund hektarar lands hafa brunnið í eldum í Grikklandi frá því um áramót og fleiri en fimm hundruð heimili gjöreyðilagst.