Minnst sjö látnir og sextíu slasaðir eftir brúarslys

Minnst sjö eru látnir eftir að átta akreina brú í Minnesota hrundi í gærkvöld á háannatíma, með þeim afleiðingum að fjöldi bíla steyptist niður í Mississippi ána. Unnið hefur verið að viðgerð brúarinnar undanfarna mánuði.

Vitni sögðust hafa heyrð gríðarháar drunur þegar hundrað og sextíu metra langur kafli brúarinnar steyptist um 20 metra niður í ána. Þá hafi hálfsokkin ökutæki flotið í ánni og fólk reynt að synda til bakkans. Kramin ökutæki, risavaxnar steypublokkir og bognir stálbitar voru dreifir um svæðið.

Rúta með sextíu skólabörn innanborðs slapp naumlega, en hún var ný farin yfir brúna þegar hún hrundi.

Fjöldi árekstra varð á brún kaflans sem hrundi, þegar ökumenn óku bílum sínum í vegrið og brúarstöpla til að forðast að keyra fram af.

Minnst 20 er enn saknað, og um sextíu manns voru flutt á spítala. Yfirvöld búast við að tala látinna hækki þegar að björgunarstörf hefjist að nýju í dagrenningu, en þeim var frestað seint í gærkvöldi vegna slysahættu.

Brúin var byggð árið 1967. Hún hafði verið skoðuð árin 2005 og 2006, án þess að nokkrir gallar finndust í burðarvirki hennar. Um tvöhundruð þúsund bílar fara um brúna á degi hverjum.

Ekki er vitað hvað olli slysinu, en heimavarnarstofnun Bandaríkjanna segir enga ástæðu til að telja að atvikið tengist hryðjuverkum.