Almennir borgarar í Afganistan verða illa úti í hernaðarátökunum

Hermenn á vegum Bandaríkjahers og Atlantshafsbandalagsins hafa drepið í það minnsta 236 almenna borgara í Afganistan það sem af er ári. Þetta kemur fram hjá fréttastofu AP. Á sama tíma er talið að uppreisnarmenn í landinu hafi drepið 178 almenna borgara.

Hamid Karzai, forseti Afganistans, fullyrðir að á síðustu 10 dögum hafi fleiri en 90 almennir borgarar látist í loftárásum sem beinst hafa að uppreisnarmönnum Talibana. Í dag lést síðan einn almennur borgari til viðbótar þegar breskir hermenn hófu skothríð á mannmörgu svæði í kjölfar þess að bíll þeirra varð fyrir sprengjuárás.

Karzai hélt í gær harðorða ræðu þar sem hann sakaði hermenn Atlantshafsbandalagsins um að gefa lítið fyrir mannslíf almennra borgara í Afganistan. Forsvarsmenn NATO hafa lýst því yfir að bandalagshermenn gætu staðið sig betur þegar kemur að því að halda borgurum utan átakanna sem geysa í landinu.