Ríflega 66 prósenta fjölgun hótelherbergja í Reykjavík

Framboð á hótelrými í Reykjavík hefur aukist um 66 prósent á síðustu fimm árum og ferðamönnum til landsins heldur áfram að fjölga. Erfitt getur reynst að fá flugferðir til útlanda á mestu annatímunum, þótt framboð þeirra hafi verið aukið og flugfélögin bætt við sig fjölmörgum nýjum áfangastöðum.

Óætt er að segja að fjölgun erlendra ferðamanna til landsins hafi verið ævintýralega. Árið 1995 komu tæplega 190 þúsund ferðamenn til Íslands, rúmum áratug seinna í lok síðasta árs voru þeir rúmlega 422 þúsund.

Guðjón Arngrímsson upplýsingafulltrúi Icelandair segir allar horfur á að þessi mikla aukning haldi áfram.

Og það er ekkert sem bendir til að það sé að draga úr straumi ferðamanna til landsins. Fyrstu tvo mánuði ársins var t.a.m. aukning upp á 20 prósent frá árinu í fyrra. Og ef fólk skipuleggur sig ekki geta Íslendingar jafnvel lent í að fá ekki sæti á háannatímum. Og sætaframboð eykst og áfangastöðum flugfélaganna fjölgar stöðugt. Þannig mun Iceland Express fljúga til 13 staða í sumar í stað þriggja áður þá á eftir að telja aukið sætaframboð Icelandair, British Airways og SAS.

Guðjón Arngrímsson segir að árið í ár verði það besta í 70 ára sögu Icelandair. Aukningin hafi verið hraðari hjá félaginu en gengur og gerist almennt í heiminum og verið 7 - 10 prósent undanfarin ár. Þá hafi fargjöld lækkað og sætaframboð aukist. Ferðalög séu eftirsótt lífsgæði hjá fólki.

Og það þarf að hýsa alla þessa ferðamenn. Árið 2003 voru hótelherbergi á tveggja til fjögurra stjörnu hótelum í Reykjavík 1937, en þeim hefur fjölgað ört undanfarin fimm ár eins og sést hér á skiltinu og þau verða orðin 3173 á þessu ár. Aukningin á þessum fimm árum er 66 prósent.

Erna Hauksdóttir framkvæmdastjóri Samtaka ferðaþjónustunnar segir að samantekt leiði í ljós að frá desember síðast liðnum fram á vor, muni 430 herbergi bætast við á hótelum borgarinnar.

Nýjasta viðbótin í hótelflóru Reykjavíkur eru 205 ný herbergi á Grand hótel, sem tekin verða í notkun fyrir mánaðamót.