Ármann Smári í landsliðið í stað Gunnars Heiðars

Ármann Smári Björnsson, leikmaður Brann, hefur verið valinn í íslenska landsliðshópinn í knattspyrnu fyrir leikinn gegn Spánverjum í næstu viku eftir að Gunnar Heiðar Þorvaldssson, leikmaður Hannover, þurfti frá að hverfa vegna meiðsla.

Gunnar hefur glímt við nárameiðsli og tóku þau sig upp eftir síðasta leik hans hjá Hannover eftir því sem segir á vef Knattspyrnusambands Íslands. Ármann Smári hefur leikið einn landsleik og var það einmitt gegn Spánverjum á Laugardalsvellinum í ágúst síðastliðnum.

Þetta er þriðja breytingin sem Eyjólfur Sverrisson landsliðsþjálfari hefur þurft að gera á upphaflegum landsliðshóp sínum en áður höfðu þeir Hólmar Örn Rúnarsson og Indriði Sigurðsson bæst í hópinn í stað Hermanns Hreiðarssonar og Jóhannesar Karls Guðjónssonar sem ekki áttu heimangegnt.