Ég mun ekki skella á Arsene Wenger

Thomas Sörensen, landsliðsmarkvörður Dana í knattspyrnu og markvörður Aston Villa, íhugar nú að óska eftir félagaskiptum til þess að geta leikið í Meistaradeildinni eða Evrópukeppni félagsliða.

Sörensen hefur verið hjá Aston Villa frá árinu 2003 en liðið hefur ekki náð að tryggja sér sæti í Meistaradeildinni eða Evrópukeppni félagsliða á þeim tíma og því er Sörensen farið að leiðast þófið. Í samtali við Jótlandspóstinn segir Sörensen að hann öfundi félaga sína í landsliðinu af því að spila í Evrópukeppnunum og hann geti vel hugsað sér að spila með einu af stóru félögunum á Englandi eins og Arsenal. „Ég mun ekki skella á ef Arsene Wenger [stjóri Arsenal] hringir í mig," segir Sörensen.

Sörensen stendur á morgun á milli stanganna hjá danska landsliðinu þegar það mætir Spánverjum á Santiago Bernabeu leikvellinum í Madríd í undankeppni Evrópumóts landsliða en liðin tvö eru með Íslendingum í riðli.