Ajax rótburstaði PSV

Ajax burstaði erkifjendur sína í PSV Eindhoven 5-1 á útivelli í stórleik helgarinnar í hollenska boltanum í dag. Klaas-Jan Huntelaar skoraði tvö mörk fyrir gestina, sem söxuðu forskot PSV niður í fimm stig þegar fimm leikir eru eftir. Þetta var næststærsti sigur Ajax á PSV í sögunni. AZ Alkmaar þurfti að sætta sig við jafntefli við Heracles á útivelli og datt því niður í þriðja sæti á eftir PSV.

Klaas-Jan Huntelaar skoraði sem fyrr segir tvö mörk fyrir Ajax í leiknum og þeir Wesley Sneijder, Garcia Gabri og Kenneth Perez eitt hver. Patrick Kluivert skoraði mark PSV, sem fékk á sig þrjú mörk á síðustu 18 mínútum leiksins.

Tapið í dag var stærsta tap PSV á heimavelli síðan liðið tapaði 5-0 fyrir Ajax í leik árið 1958, en PSV fékk síðast á sig fimm mörk á heimavelli árið 1967. Ajax hafði ekki unnið PSV á útivelli síðan árið 1994 og hafði raunar ekki skorað á móti erkifjendum sínum í deildinni í síðustu fimm leikjum liðanna.