Tveggja barna móðir sem glímir við afleiðingar heilablóðfalls fær ekki íbúð í Mosfellsbæ

Allt stefnir í að tveggja barna móðir, sem fékk heilablóðfall fyrir þremur árum, verði á götunni þann 1. mars næstkomandi, en hún er úrkula vonar um lausnir í húsnæðismálum sínum. Hún og foreldrar hennar hafa ítrekað beðið bæjarstjórn Mosfellsbæjar um úrræði en fengið þau svör að enga hjálp sé að fá þar í bæ

Forsaga málsins er sú að í apríl 2004 fékk Steinunn Jakobsdóttir heilablóðfall. Hún var þá 27 ára nýfráskilin móðir tveggja barna og hafði búið í Mosfellsbæ í átta ár þar sem börn hennar hafa alla tíð gengið í skóla. Fyrrverandi maður hennar tók börnin alfarið að sér í kjölfar veikinda Steinunnar. Eftir áfallið bjó hún í ár á Grensási þar sem hún var við endurhæfingu en að henni lokinni flutti hún til foreldra sinna. Húsnæði foreldra hennar hentar ekki fyrir þrjá fullorðna einstaklinga og börn aðra hverja helgi. Steinunn fékk því úthlutaða endurhæfingaríbúð Sjálfsbjargar þar sem einstaklingur getur dvalist í eitt ár. Nú er árið á enda og fáar lausnir í sjónmáli.

Foreldrar Steinunnar hafa stutt við hana af öllum mætti og jafnvel boðið bæjaryfirvöldum að kaupa íbúð ef bærinn gæti komið til móts við þau með sérstökum húsnæðisbótum. Svörin sem foreldrum var gefin voru þau að engar reglur kveði á um slíkt og að bæjarfélagið hafi selt svo margar félagslegar íbúðir að undanförnu, að ekki sé hægt að veita Steinunni slíka íbúð. Foreldrar hennar hafa því spurt sig hvers vegna ekki sé hægt að fjölga þeim þegar á reynir.

Og Steinunn er ekki bjartsýn á hvað taki við að viku liðinni þegar hún þarf að flytja úr íbúð Sjálfsbjargar; " Ég myndi yppta báðum öxlum ef ég gæti, en við mér blasir bara gatan og óvissan"