Kína fellir niður skuldir Líberíu

Kínverjar hafa fellt allar skuldir Líberíu við Kína niður. Ellen Johnson-Sirleaf forseti Líberíu segir skuldaniðurfellinguna mikilvæga fyrir landið og biðlar til annara skuldunauta landsins að fylgja fordæmi Kínverja.

Hu Jintao forseti Kína er í opinberri heimsókn í þessu stríðshrjáða Afríkuríki og hefur í heimsókninni, auk skuldaniðurfellingarinnar, skrifað undir samninga um aðstoð Kínverja í mennta- og heilbrigðismálum Líberíu. Kínverjar segja ásetning sinn að aflétta skuldum af fleirri Afríkuríkjum og segja ásetninginn góðan. Gagnrýnendur Kínastjórnar efast hinsvegar um tilganginn og því hefur verið haldið fram að Kínverjar séu að tryggja sér möguleika á ódýrasta vinnuafli heims og að þeir hafi hug á því að ná peningunum til baka með öðrum hætti. Þá hafa gagnrýnendur bent á að Kínverjar ættu að líta sér nær.