Tók ekki linsurnar úr í heilt ár

Fjarlægja þurfti augnlinsur úr kínverskum manni með uppskurði eftir að hann hafði þær í augunum í heilt ár. Liu sem er fertugur fékk linsur fyrir ári síðan. Hann tók þær ekki úr augunum, því honum fannst það erfitt. Þegar hann fann fyrir óþægindum notaði hann augndropa.

Fyrir stuttu fannst honum sjónin vera að versna og brá þá á það ráð að kaupa nýjar linsur, sem hann setti yfir þær gömlu. Sjónin batnaði ekki við það, svo Liu tók þá ákvörðun að setja notað par af linsum yfir hin tvö pörin. Næsta dag var ástandið ómögulegt og Liu leitaði loks læknisaðstoðar. Læknirinn sagðist hafa fengið áfall þegar hann áttaði sig á því að linsurnar höfðu gróið fastar við augað og þörf væri á uppskurði til að ná þeim úr.