Svíar opna sýndarsendiráð

Svíþjóð verður fyrsta landið til að opna sýndarsendiráð í tölvuleiknum Second Life. Nokkur stórfyrirtæki hafa þegar opnað útibú í sýndarheimnum þar sem rúmlega þrjár milljónir spilara eyða stórum hluta af sínum frítíma, eða jafnvel öllum sínum tíma.

Sendiráðið mun ekki gefa út vegabréfsáritanir eða vegabréf en það mun benda spilurum á hvar hægt sé að nálgast slíkt. Það er kynningarfyrirtæki sem vinnur fyrir sænska utanríkisráðuneytið sem mun sjá um sýndarsendiráðið.

Second Life tölvuleikurinn er sýndarveröld þar sem spilarar skapa sér persónu sem getur farið og kannað sýndarheiminn. Þær geta hitt og átt samskipti við aðrar persónur og lifað daglegu lífi í sýndarheimum.