Hugsanleg brot Ísraelsmanna á vopnalögum

Utanríkisráðuneyti Bandaríkjanna birtir Bandaríkjaþingi bráðabirgðaskýrslu í dag um það hvort vopnalög Bandaríkjanna hafi verið brotin þegar Ísraelar vörpuðu klasasprengjum, framleiddum í Bandaríkjunum, á íbúðabyggð í Líbanon síðastliðið sumar.

Talsmaður ráðuneytisins sagði ekki koma til greina að birta niðurstöður skýrslunnar þar sem þær eru ekki endanlegar. Utanríkisráðuneytinu ber skylda til að láta þingið vita af því jafnvel ef fyrstu bráðabirgðaathuganir benda til brota á vopnalögunum.

Bandaríska blaðið New York Times greindi frá því á netsíðu sinni á laugardagskvöld að skýrslan greini frá því að Ísraelar hafi brotið samkomulag sitt við Bandaríkin, um notkun klasasprengja sem Bandaríkjamenn sáu þeim fyrir.