Viðræður halda áfram

British Airways hélt viðræðum við stærsta stéttarfélag starfsmanna áfram í dag til þess að reyna að koma í veg fyrir að meðlimir þess fari í tveggja sólarhringa verkfall. Verkfallið, ef af verður, hefst á þriðjudag. Hvorugur aðili vildi þó segja hvernig viðræður gengju. British Airways hefur þegar aflýst rúmlega 1.300 flugferðum í vikunni vegna verkfallsins.

Tveggja daga verkfallið mun hafa áhrif á ferðaáætlanir fleiri en 140.000 ferðalanga en verkfallsins mun gæta mest á flugvöllunum Heathrow og Gatwick. Deilan snýst aðallega um veikindadaga og laun áhafna en um 10.500 af 15.000 áhafnarstarfsmönnum British Airways eru meðlimir í stéttarfélaginu sem hótar verkfallinu.