Hóta fleiri árásum í Grikklandi

Vinstrisinnaðir hryðjuverkamenn sem skutu handsprengju að bandaríska sendiráðinu í Aþenu fyrr í mánuðinum hótuðu í morgun fleiri árásum á grísk og bandarísk skotmörk. Byltingarbaráttuhópurinn svonefndi lýstu ábyrgð á hendur sér í fimm síðna yfirlýsingu þar sem ríkisstjórnir Bandaríkjanna og Grikklands voru gagnrýndar.

"(Við stefnum að því að) losna við herstöðvar Bandaríkjamanna og NATO úr landinu okkar og kollvarpa þeim sem vinna með þeim," sagði í yfirlýsingu frá samtökunum sem birt var í dag.

Byltingarbaráttuhópurinn kom fyrst fram fyrir fjórum árum síðan. Eftir sprengjuárásina á sendiráðið er hópurinn talin mesta ógn við öryggi í Grikklandi síðan 17. nóvember-hópurinn var leystur upp árið 2002. Engan sakaði í árásinni á sendiráðið og skemmdir urðu ekki teljandi.