Chicago á höttunum eftir Zidane

Forráðamenn bandaríska knattspyrnufélagsins Chicago Fire hafa viðurkennt að þeir hafi gert Frakkanum Zinedine Zidane tilboð um að koma og spila með félaginu, en hann er ekki eini leikmaðurinn sem fengið hefur símtal frá borg vindanna undanfarið.

"Við reyndum ákaft að krækja í Zidane, en við fengum alltaf þau skilaboð að hann væri búinn að leggja skóna á hilluna," sagði talsmaður Chicago-liðsins. "Við reyndum líka að fá Henrik Larsson til okkar, en hann var ófáanlegur til að yfirgefa Helsingborg. Hann gat auðvitað ekki neitað að fara til Manchester United en hann ætlar ekki að gefa sig með það að snúa aftur til Svíþjóðar þegar hann klárar samninginn á Englandi," sagði sagði talsmaður Chicago Fire, sem einnig hafði verið á höttunum eftir Claudio Reyna sem var látinn fara frá Fulham í gær - en hann hefur nú þegar samið við lið New York Red Bulls í MLS deildinni.