Vetrarveður veldur usla á meginlandi Evrópu

Vetrarveður hefur valdið töluverðum usla í Norður- og Mið-Evrópu í dag og eru þrír látnir í umferðarslysum í Þýslandi sem rekja má til hálku á vegum. Þá eru tugir slasaðir í landinu. Auk þess hefur tugum flugferða verið frestað vegna snjókomu.

Þá hefur fyrsti snjórinn í Bretlandi truflað umferð á vegum og lestarteinum í suðausturhluta landsins. Þar er búist við áframhaldandi snjókomu á morgun og föstudag.

Í Frakklandi stöðvaðist umferð á hraðbraut í austurhluta landsins vegna snjókomu og hafa slökkviliðsmenn og lögregla haft í nógu að snúast við að aðstoða ökumenn. Þá eru um 85 þúsund heimili án rafmagns í Mið-Frakklandi.

Ekki er þó víst að allir bölvi snjónum því þeir sem reka skíðasvæði í Evrópu geta loksins farið að opna þau eftir snjóaleysi framan af vetri.