Paris Hilton fær skilorðsbundinn dóm fyrir ölvunarakstur

Dekurdrósin Paris Hilton, einn af erfingjum Hilton-hótelkeðjunnar, var í dag dæmd í þriggja ára skilorðsbundið fangelsi eftir að hún viðurkenndi að hafa ekið undir áhrifum áfengis. Hún var jafnframt sektuð um 390 dollara, rúmlega 27 þúsund krónur fyrir athæfið. Hilton mætti ekki við dómsuppkvaðninguna heldur sendi aðeins lögmenn sína en henni var jafnframt gert að sækja námskeið um áhrif áfengis á fólk.

Hilton var gripin ölvuð á bíl sínum í september síðastliðnum eftir að lögregla hafði tekið eftir skrykkjóttu ökulagi bíls í Hollywood. Í viðtali við útvarpsstöð síðar sagðist Hilton aðeins hafa fengið sér einn drykk á fjáröflunarsamkomu en að hún hefði verið þreytt eftir að hafa varið öllum deginum við upptöku á tónlistarmyndbandi.