Mona Sahlin fyrsti kvenleiðtogi jafnaðarmanna

Mona Sahlin verður næsti formaður Jafnaðarmannaflokksins í Svíþjóð, fyrst kvenna. Frá þessu var greint á blaðamannafundi í Stokkhólmi í dag. Hún tekur við forystu í flokknum af Göran Persson sem ákvað að halda ekki áfram eftir að flokkurinn tapaði í þingkosningum á síðasta ári.

Sahlin hefur verið nokkuð umdeild en hún sagði af sér sem ráðherra árið 1995 eftir að upp komst að hún hefði notað opinbert kreditkort til að greiða fyrir ýmsar vörur. Sahlin sneri aftur árið 1998 og hefur síðan tekið þátt í sænskum stjórnmálum.

Sahlin sagði á blaðamannafundinum í dag að stjórnmál væru hennar líf og yndi og að hún teldi sig reiðubúna til þess að leiða jafnaðarmenn til sigurs í næstu þingkosningum. Sagðist hún stolt yfir að vera fyrsti kvenleiðtogi flokksins en hún væri jafnframt sormædd yfir því að Anna Lindh, fyrrverandi utanríkisráðherra, stæði ekki í hennar sporum í dag. Lindh var myrt árið 2003 en flestir töldu þá að hún myndi taka við af Göran Persson.

Sahlin sagðist í leiðtogatíð sinni myndu leggja áherslu á þrennt: loftslagsmál, velferðarkerfið og atvinnumál en atvinnuleysi hefur aukist á undanförnum árum í Svíþjóð.

Nýr formaður verður formlega valinn á þingi jafnaðarmanna í mars næstkomandi.