Búist við að Sahlin verði næsti leiðtogi sænskra jafnaðarmanna

Búist er við því að tilkynnt verði á blaðamannafundi síðar í dag að Mona Sahlin verði nýr leiðtogi jafnaðarmanna í Svíþjóð. Fram kemur á vef sænska ríkisútvarpsins að hún hafi samþykkt í símtali við valnefnd flokksins að taka við forystu af Göran Persson sem ákvað að halda ekki áfram eftir að flokkurinn tapaði í þingkosningum á síðasta ári.

Sahlin hefur verið nokkuð umdeild en hún sagði af sér sem ráðherra árið 1995 eftir að upp komst að hún hefði notað opinbert kreditkort til að greiða fyrir ýmsar vörur, þar á meðal súkkulaði. Á þeim tíma var talað um hana sem næsta formann Jafnaðarmannaflokksins en af þvi varð ekki.

Sahlin sneri aftur árið 1998 og hefur síðan tekið þátt í sænskum stjórnmálum. Háværar kröfur eru um það nú innan flokksins að kona leiði jafnaðarmenn en það hefur aldrei gerst í 118 ára sögu flokksins. Eftir að aðrir kvenkandídatar höfðu neitað því að taka við forystuhlutverkinu játaði Sahlin en nýr formaður verður formlega valinn á þingi jafnaðarmanna í mars næstkomandi.