Tugir ættflokka sem aldrei hafa kynnst umheiminum

Mun fleiri ættflokkar indíána búa í regnskógum Amasón en áður var haldið. Þeir eru einangraðir frá umheiminum. Með hraðri eyðingu regnskóga er hins vegar hætta á því að umheimurinn nái í skottið á þeim fljótlega og lífsviðurværi þeirra og bústaðir eyðileggist.

Indíánarannsóknarstofnun Brasilíu kynnti skýrslu í dag þar sem áætlað er að 67 ættflokkar indíána búi í Amasón-skógunum í stað 40 áður. Stofnunin rannsakaði gamlar og nýjar skýrslur um fótspor, yfirgefna kofa og önnur merki um mannaferðir eða -bústaði í stærsta regnskógi heims.

"Það eru enn víðáttumikil svæði ókönnuð og nýjar vísbendingar um (ættflokka indíána)," segir Marcelo dos Santos, yfirmaður þeirrar deildar stofnunarinnar sem rannsakar indíána sem enn hafa ekki komist í snertingu við umheiminn. Brasilía hefur líklega flesta ættflokka í heimi sem hafa ekki kynnst umheiminum í návígi.