Chavez neitar alvarlegum veikindum Kastrós

Hugo Chavez, forseti Venesúela og góðvinur Kastrós, neitar orðrómi um að Kúbuforsetinn sé alvarlega sjúkur. Chavez ræðir reglulega við Kastró og segir hann vera hægt og bítandi að jafna sig eftir skurðaðgerðir, orðrómur um að hann liggi fyrir dauðanum sé uppspuni úr ranni Bandaríkjamanna.

Chavez segir umheiminum reglulega frá ástandi Kastrós en Reuters-fréttastofan segir forsetann venesúelska hafa verið daufan í dálkinn er hann ræddi um Kastró í þetta skiptið. "Ég er ekki læknir, ég er ekki við rúmstokkinn hjá Fídel en hann er ekki alvarlega sjúkur og hann er ekki með krabbamein. Hann sagði (við mig) að þetta sé hægur bati og tvísýnn. Hann er 80 ára," sagði Chavez við blaðamenn í Ekvador, þar sem hann er í heimsókn.

Spænska dagblaðið El Pais sagði frá því í gær að Kastró væri helsjúkur og þyrfti að fá næringu í æð. Þar sagði einnig að þrjár árangurslausar aðgerðir hefðu verið gerðar á meltingarfærum hans.