Einn af talsmönnum Múllah Omars handtekinn

Afgönsk yfirvöld greindu frá því í dag að afganskar sveitir hefðu handtekið Mohammad Hanif, talsmann Múllah Mohammads Omars, leiðtoga talibana í landinu.

Hanif var gripinn í smábæ við landamæri Pakistans skömmu eftir að hann kom frá Pakistan ásamt tveimur öðrum mönnum. Reuters-fréttaveitan hefur eftir talsmanni leyniþjónustu Afganistans að fylgst hafi verið með ferðum Hanifs og hann gripinn um leið og hann kom yfir landamærin. Hanif er í hópi manna sem hafa tjáð sig fyrir hönd talibana undanfarin ár en annar talsmaður uppreisnarmannanna var handtekinn í Pakistan árið 2005 og afhentur afgönskum yfirvöldum.