Þrettán talibanar felldir í Suður-Afganistan

Þrettán uppreisnarmenn úr röðum talibana eru sagðir hafa fallið í átökum við hermenn NATO og afgönsku stjórnarinnar í Helmand-héraði í suðurhluta Afganistans síðustu daga. Þá hafa tveir breskir hermenn fallið í átökunum.

Talsmenn NATO segja umtalsverðan fjölda uppreisnarmanna hafa fallið í loftárásum bandalagsins en hafa ekki gefið upp tiltekinn fjölda en innanríkisráðuneyti Afganistans segir þrettán hafa fallið í átökunum. Robert Gates, nýr varnarmálaráðherra Bandaríkjanna, kom í fyrstu heimsókn sína til Afganistans seint í gærkvöld þar sem hann hugðist fullvissa yfirmenn herja um að vel yrði stutt við bakið á þeim í baráttunni við talibana.