Miklar mótmælagöngur á Spáni

Hundruð þúsunda Spánverja fóru í dag í þöglar friðargöngur í mörgum borgum landsins. Fólkið var að mótmæla því að aðskilnaðarsamtök Baska, ETA, rufu níu mánaða vopnahlé sitt fyrir tveim vikum með gríðarlegri bílsprengju sem varð tveim mönnum að bana á flugvelli Madridar.

Eftir sprenginguna sleit spænska ríkisstjórnin samningaviðræðum við baska, sem menn voru farnir að vona að myndi binda enda á fjörutíu ára hryðjuverkasögu ETA. Hryðjuverk þeirra hafa kostað yfir 800 manns lífið. Ríkisstjórnin er nú undir miklum þrýstingi að skýra frá því hver stefna hennar verður gagnvart böskum, eftir ódæðisverkið fyrir tveimur vikum.