Norsk börn smíðuðu gálga í "Saddams-leik"

Árvakur kennari í Follo í Noregi náði að grípa í taumana í tæka tíð þar sem hópur skólabarna í þriðja bekk voru úti á skólalóðinni í Saddams-leik. Leikurinn gekk út á að taka einhvern af hinum börnunum til fanga og þegar kennarinn kom að stóð einn "fanginn" með snöru um hálsinn.

Atvikið átti sér stað fyrir viku síðan og foreldrar barnanna fengu sent bréf þar sem kennarar og skólayfirvöld lýstu áhyggjum sínum yfir því að helmingur barnanna í þriðja bekk höfðu séð myndbandið sem sýnir þegar Saddam Hussein er hengdur, sem tæpast getur talist barnaefni. Skólastjórinn bendir á að algengt sé að börn leiki eftir það sem þau hafi séð í sjónvarpinu, hvort sem það eru saklausir hlutir eða ofbeldisverk.

Einnig bendir norska blaðið Aftenposten á atvik sem átti sér stað í Gausdal í Oppland-héraði þar sem nokkur börn voru samankomin í stofu í heimahúsi og léku leik þar sem einn var skúrkurinn og hinir voru að undirbúa hengingu hans þegar fullorðnir skárust í leikinn.