Sýfilistilfellum fjölgar ört í Kína

Ný skýrsla sem birtist í virtu læknatímariti leiðir í ljós að Kínverjar glíma nú við ört hækkandi tíðni kynsjúkdómsins syphilis. Sjúkdómnum var nánast útrýmt í Kína á sjöunda og áttunda áratugnum en nú þarf að bregðast við vaxandi útbreiðslu á ný.

Sérstaklega vekur ugg að leiða má líkur að því að nýsmit annarra kynsjúkdóma haldist í hendur við vaxandi tíðni sýfilis.

Árið 1993 voru nýgreind sýfilissmit í kringum 0,2 á hverja 100 þúsund íbúa en árið 2005 hafði þetta hlutfall flogið upp í 5,7 á hverja 100 þúsund. Sjúkdómurinn er enn langútbreiddastur hjá fólki sem er í áhættuhópum, svo sem hjá þeim sem vinna fyrir sér í kynlífsiðnaðinum og karlmönnum sem stunda kynlíf með öðrum körlum. Þar nær hlutfall smitaðra allt að 10-20%.

Breytt þjóðfélag á mestan þátt í þessum nýju smitum. Útlendingar eiga nú greiðari leið inn í kínverskt þjóðfélag og vændi hefur aukist. Þá stundar fólk í auknum mæli kynlíf utan hjónabands, oft óvarið.