Stríðsherrar skila vopnunum

Nokkrir stríðsherranna sem barist hafa í Sómalíu síðustu 16 árin hafa samþykkt að leggja niður vopn eftir að bardagar í morgun urðu að minnsta kosti 5 manns að bana. Stríðsherrarnir funduðu með forsetanum Abdullahi Yusuf í höfuðborginni Mogadishu í dag þar sem þetta varð niðurstaðan.

Talsmaður forsetans nafngreindi sjö stríðsherra sem sumir eru afar valdamiklir í landinu. Þeir ætla að sögn forsetans að vinna með ríkisstjórninni við að koma á friði og stöðugleika í landinu. Þeir munu sjálfir sjá til þess að menn þeirra afvopnist og gangi að svo búnu til liðs við stjórnarher landsins.

Jafnvel meðan viðræðurnar stóðu héldu bardagarnir áfram við forsetahöllina þar sem byssumenn stríðsherranna börðust við forsetaverðina.

Stríðsherrarnir og forsetinn sneru aftur til Mogadishu fyrr í vikunni eftir að íslömskum uppreisnarmönnum hafði verið bolað burt úr höfuðborginni og síðar að mestu úr landi.

Á sama tíma heldur mannúðarstofnunin Oxfam því fram að í það minnsta 70 saklausir borgarar hafi látið lífið í loftárásum sem ætlaðar voru íslamistum og meintum liðsmönnum hryðjuverkasamtakanna Al Kaída.