Karlmenn 30 milljónum fleiri en konurnar

Fullorðnir kínverskir karlmenn verða 30 milljónum fleiri en konur á sama aldri innan 15 ára. Þetta orsakast af strangri stefnu stjórnvalda til að ná tökum á fólksfjölgun í Kína, með því að takmarka barneignir við eitt barn á hvert par. Kynbundnar fóstureyðingar hafa verið stundaðar markvisst síðan þá.

Ríkisdagblaðið China Daily greinir frá þessu á forsíðu í dag og spáir því einnig að félagslegur órói muni fara vaxandi í landinu vegna þeirra tugmilljóna karlmanna sem ekki ná að finna sér eiginkonu vegna óhagstæðs kynjahlutfalls.

Kínversk stjórnvöld hafa náð nokkrum árangri með eins barns stefnu sinni þrátt fyrir að kínverska þjóðin sé enn sú langfjölmennasta í heimi. Kynbundnar fóstureyðingar eru ólöglegar í landinu en samt víða stundaðar, sérstaklega í sveitum landsins.

Blaðið segir að kynjahlutföll nýfæddra barna í Kína hafi verið 118 nýfæddir drengir á móti hverjum 100 stúlkum sem fæðast. Hlutfallið er þannig heldur að skekkjast, þar sem það var 110 drengir fyrir hverjar 100 stúlkur árið 2000. Enn frekar skekkist myndin þegar litið er til landbúnaðarhéraða á borð við Guangdong og Hainan í suðurhluta landsins, þar stekkur munurinn upp í 130 drengi á móti hverjum 100 stúlkum.

Meðaltalið í iðnvæddum löndum er á bilinu 104 til 107 nýfæddir drengir fyrir hverjar 100 stúlkur sem fæðast.