Segja 70 hirðingja hafa verið drepna í loftárásum í Sómalíu

Bresku hjálparsamtökin Oxfam greindu frá því í dag að 70 hirðingjar hefðu verið drepnir í loftárásum sem átti að beina gegn íslamistum í Suður-Sómalíu á síðustu dögum. Vitnuðu samtökin í upplýsingar frá samstarfssamtökum í Sómalíu máli sínu til stuðnings og sögðu það skyldu samkvæmt alþjóðalögum að greina frá því ef borgarar féllu í hernaðarátökum.

Bæði Bandaríkjamenn og Eþíópíumenn hafa staðið fyrir loftárásum í landinu, Bandaríkjamenn gegn meintum al-Qaida liðum en her Eþíópíu gegn herskáum íslamistum sem stjórnuðu landinu áður en Eþíópíumenn studdu stjórnarher Sómalíu í því að stökkva þeim á flótta.

Ekki liggur fyrir út hvaða flugvélum sprengjurnar komu sem grönduðu hirðingjunum. Þá greindu Oxfam-samtökin einnig frá því að sprengjur hefðu lent á mikilvægum vatnsbólum.