Hjálpaði Bin Laden að flýja

Afganski uppreisnarleiðtoginn Gulbuddin Hekmatyar sagðist í sjónvarpsviðtali í dag hafa aðstoðað Osama bin Laden að flýja þegar Bandaríkjaher lét sprengjum rigna yfir Tora Bora fjöllin, þar sem bin Laden hafðist við um tíma árið 2001.

Hekmatyar er fyrrverandi forsætisráðherra Afganistans og leiðir vígahópinn Hezb-e-Islami. Hann sagði í viðtali við einkarekna sjónvarpsstöð í Pakistan að hann og menn hans hefðu fylgt bin Laden, aðstoðarmanni hans Ayman al-Zawahiri og öðrum fylgismönnum þeirra á öruggan stað, þar sem hann hafi einnig hitt þá síðar. Hann neitaði hins vegar að segja nokkuð um það hvar þessi staður væri.

Bin Laden og al-Zawahiri eru enn taldir vera í felum við landamæri Pakistans og Afganistans. Hekmatyar sagðist hins vegar ekki hafa nein tengsl við hryðjuverkasamtökin al Kaída.