Apple kynnir símtækið iPhone

Steve Jobs, forstjóri Apple Computer steig á svið í Moscone sýningarhöllinni í San Francisco í dag og tilkynnti innreið Apple á símamarkaðinn. Jobs sýndi nýtt tæki frá Apple, símtækið iPhone, sem er jafnframt, tölva með WiFi og Bluetooth tengingu, og tónlistar og vídeó-spilari.

Virka hlið símans er öll einn 3,5 tommu litsnertiskjár og allar aðgerðir fara fram um hann. Skjárinn hefur hæstu upplausn sem hingað til hefur þekkst í tæki sem þessu (160 dpi). Stýrkerfi tækisins er Apple OS X, sama kerfi og knýr Apple tölvur. Símastaðallinn sem notast er við er GSM+EDGE.

Símafyrirtækin hafa skolfið á beinunum, því Apple hefur áður tekist að hasla sér völl á nýjum sviðum, eftir að búið var nánast að afskrifa fyrirtækið yfir nokkrum árum, til dæmis þegar fyrirtækið kynnti til sögunnar iPod tónstokkinn 2001, sem hefur haft algera yfirburði á sínu sviði.

Reiknað er með að Apple síminn fari nær því en nokkurt tæki hingað til að sameina getu síma og tölvu og verði jafnvígt á tónlist, vídeó, tölvuforrit, og símaþjónustu -- í raun fyrsta tækið af nýrri kynslóð handtækja.

Tækið mun vera þynnra en áður hefur þekkst, eða um tæpir tólf millimetrar. Síminn er með 2 megapixla myndavél.

Hægt er að fylgjast með á síðunni http://www.macrumorslive.com/ en þar er textaskrá sem er uppfærð á hverri mínútu með nýjustu fréttum af undratækinu i-Phone.

Hlutabréf Apple hafa rokið upp við fréttina af nýja tækinu, sem Steve Jobs segir vera fimm ár á undan samkeppninni.