Drekarnir leyfðir á ný

Flugdrekaflug hefur verið leyft á ný í Punjab-héraði í Pakistan, fyrir hina árlegu Basant vorhátíð í febrúar. Strangar reglur munu hins vegar gilda um keppnina þar sem glerhúðaðir eða stálstyrktir drekastrengir hafa á liðnum árum valdið alvarlegum meiðslum og jafnvel gert fólk höfðinu styttra.

Hæstiréttur Pakistans bannaði þessa vinsælu íþrótt árið 2005 eftir að nokkrir létust í árlegri flugdrekakeppni. Hinir hættulegu flugdrekastrengir eru einmitt styrktir eða glerjaðir til að ráðast á aðra dreka og skera á þeirra strengi, sem og til að verjast árásum annarra. Keppnina vinnur sá dreki sem lengst helst á lofti.

Basant-hátíðin byrjar þann 25. febrúar og er mjög vinsæl meðal ferðamanna en trúarleiðtogar segja hátíðina ekki samræmast íslam. Flugdrekabannið verður aftur sett á eftir hátíðina.