Þýskir flugumferðarstjórar hóta verkfalli

Flugumferðarstjórafélag Þýskalands sagði í dag að verkfall væri líklegt innan 100 klukkustunda, eða fjögurra sólarhringa. Flugmálastjórn Þýskalands Deutsche Flugsicherung boðaði hins vegar til frekari samningaviðræðna og hyggst kalla til sáttasemjara til að leysa deiluna. Verkfall myndi þýða tafir fyrir hundruð þúsunda ferðalanga.

Verkfallið byrjar í síðasta lagi á miðvikudag ef ekki hefur samist fyrir það. Til þess verður hins vegar boðað sérstaklega með nákvæmri tímasetningu í það minnsta sólarhring fyrr.