13 létust í demantanámu

Minnst 13 manns létust þegar demantanáma hrundi í Austur-Kongó í gær. 13 lík fundust í gær en sveitarstjórinn segir að verið sé að leita í rústunum, hvort einhverjir fleiri hafi lent í slysinu. Þrír komust lífs af í slysinu en náman er 15 metra djúpur, opinn skurður.

Austur-Kongó er ríkt af góðmálmum og demöntum en fátækt og neyð hefur engu að síður verið algeng frá því að 5 ára borgarastríði lauk þar árið 2003. Á meðan á því stóð var rænt og ruplað í flestum námum eða þær eyðilagðar. Frumstæðar, opnar námur sem þessi eru því algengar og eins er algengt að þær hrynji saman.