Bush tilnefnir Negroponte sem varautanríkisráðherra

George Bush Bandaríkjaforseti hefur tilnefnt Mike McConnel, fyrrverandi yfirmann Þjóðaröryggisstofnunar Bandaríkjanna, sem nýjan yfirmann leyniþjónustustofnana landsins. Hann tekur við af John Negroponte sem verður varautanríkisráðherra og því staðgengill Condoleezu Rice.

Bush tilkynnti um þetta á blaðamannafundi í dag og sagðist um leið binda miklar vonir við þá í störfum sínum og að hann vonaðist til þess að Bandaríkjaþing staðfesti tilnefningu beggja sem fyrst.

Á blaðamannafundinum sagði Negroponte að hann hefði með nýja starfinu fengið tækifæri lífs síns og þá sagðist McConnel hlakka til að koma aftur til starfa í leyniþjónustunni.

Breytingarnar eru hluti af áætlun Bush-stjórnarinnar um að endurskoða stefnu sína í Írak og endurskipuleggja skipulag þjóðaröryggismála á síðustu tveimur árunum í starfi Bush sem forseta.