Leikjatölva drepur dreng

Sjö ára drengur frá Englandi fékk banvænt raflost á laugardaginn þegar hann var að hlaða Game Boy leikjatölvuna sína. Drengurinn var í fríi með foreldrum sínum í Pukhet í Thailandi og hafði fengið leikjatölvuna í jólagjöf. Hann var að taka hana úr sambandi við hleðslutæki sem móðir hans hafði keypt í Thailandi þegar hann fékk straum og lést.

Móðir hans sagði að honum hefði verið fullkunnugt um hættur sem stöfuðu af rafmagni og neitaði getgátum um að drengurinn hafi enn verið votur úr sundi þegar hann handlék leikjatölvuna.