Pyntingarmál í Afganistan skekja dönsk stjórnmál

Komið hefur í ljós að pyntingar fóru fram í fangabúðum í Kanadahar í Afganistan þar sem fangar, sem danskir hermenn afhentu bandarískum starfsbræðrum sínum í mars 2002, dvöldu. Frá þessu er greint á vef Politiken.

Málið komst í hámæli fyrir áramót þegar heimildarmynd um málið var frumsýnd í Kaupmannahöfn. Þá sögðu dönsk yfirvöld að engar upplýsingar lægju fyrir um að fangar þar hefðu sætt pyntingum. Nú liggja hins vegar fyrir eiðsvarnar yfirlýsingar um að pyntingum var beitt í búðunum þar sem fangarnir dvöldu í Kandahar-héraði. Voru fangar þar meðal annars dregnir um í rusli og barðir til blóðs.

Þessar upplýsingar koma rannsóknarnefnd danska hersins á óvart en hún rannsakar nú aðkomu Dana að málinu og birtir skýrslu sína um málið í næstu viku. Stjórnarandstaðan í Danmörku fer fram á nýja óháða rannsókn á grundvelli þessara nýju upplýsinga. Þá lýsa stuðningsflokkar stjórnarflokksins Venstre, Danski þjóðarflokkurinn og Íhaldsflokkurinn, yfir áhyggjum vegna þessara nýju upplýsinga.