Demókratar við völd eftir 12 ár

Demókratar tóku formlega völdin í Washington þegar meirihluti þeirra í báðum deildum Bandaríkjaþings sór embættiseið í dag. Nancy Pelosi varð einnig fyrsta konan sem kjörin er forseti neðri deildarinnar, líkt og búist hafði verið við. Einnig var brotið blað í sögu þingsins þegar nýr þingmaður sór í fyrsta skipti embættiseið meö hönd á kóraninum en ekki biblíunni.

Demókratar hafa verið í minnihluta í báðum deildum Bandaríkjaþings í 12 ár, þannig að nú má búast við stefnubreytingu í þinginu. Bush Bandaríkjaforseta mun þyngjast róðurinn það sem eftir lifir seinna kjörtímabils hans, eins og títt er þegar þingmeirihlutinn er af öðrum flokki en forsetinn.

Atkvæði þingmanna skiptust nokkurn veginn eftir flokkslínum þegar forseti neðri deildarinnar var kjörinn í dag. Nancy Pelosi, sem leiddi kosningabaráttu demókrata og hafði verið leiðtogi þingflokksins meðan flokkurinn var í minnihluta hlaut öruggt kjör, eins og fastlega hafði verið búist við.

Hún þykir röggsamur leiðtogi og hefur einsett sér að uppræta spillingu á Kapítol-hæð, þessu lýsti hún með orðunum: "Það þarf konu til að þrífa hús", og átti þar við fulltrúadeildina sem á ensku kallast fulltrúahúsið.