Átök í Ramallah í dag

Að minnsta kosti fjórir Paletínumenn létust og 20 særðust í aðgerðum Ísraelshers í Ramallah á Vesturbakkanum í dag. Markmið hersins var að sögn ísraelskra yfirvalda að handtaka eftirlýsta Palestínumenn en í brýnu sló á milli þeirra og herskárra Palestínumanna í miðborg Ramallah.

Fram kemur á fréttavef breska ríkisútvarpsins að ísraelskir herbílar og gröfur hafi lokað götum í borginni í leit sinni að mönnunum en haft er eftir yfirmanni í öryggissveitum Palestínumanna að Ísraelsher hafi verið á höttunum eftir leiðtoga al-Aqsa herdeildanna, sem er herskár hópur tengdur Fatah-hreyfingu Abbas forseta. Fjórir menn munu hafa verið handteknir í áhlaupi hersins sem stóð í klukkustund.

Vopnahlé hefur verið í gildi milli Palestínumanna og Ísraela frá því í nóvember, en ítrekað hefur slegið í brýnu milli þeirra á Vesturbakkanum síðan þá.