Ólympíueldurinn skal upp á Everest

Áður en kyndillinn með Ólympíueldinum kemur til Peking fyrir Ólympíuleikana 2008 mun leið hans liggja upp á hæsta tind á jörðinni, á Mount Everest í Himalaya-fjallgarðinum. Búið er að útbúa sérstaka öskju þar sem eldurinn getur brunnið þegar hann fer um súrefnissnautt háfjallaloftið.

Þetta verður í fyrsta skipti sem Ólympíueldurinn fer um hæsta fjall í heimi og líklega einnig í fyrsta skipti sem eldur brennur á móður fjallanna í Nepal. Ætlunin er að ganga á fjallið upp hina nepölsku suðurhlíð fjallsins og niður norðurhlíðina til Tíbets, sem Kínverjar hertóku árið 1950.

Endanleg ferðaáætlun Ólympíueldsins hefur enn ekki verið ákveðin enda þarf alþjóða Ólympíuráðið fyrst að leggja blessun sína yfir hana.