Bandaríska þingið hafnar tillögu um endurbætur á innflytjendalögum

Bandaríska þingið hefur hafnað tillögu George Bush Bandaríkjaforseta um ný lög um innflytjendur sem hefðu gert milljónum ólöglegra innflytjenda í Bandaríkjunum kleift að sækja um dvalarleyfi.

Tillaga Bush um að veita allt að tólf milljónum ólöglegra innflytjenda dvalarleyfi og herða landamæraeftirlit til að koma í veg fyrir frekari straum ólöglegra innflytjenda var í gær felld í öldungadeild bandaríska þingsins. Niðurstaðan þykir áfall fyrir Bush, sem hefur lagt mikla áherslu á að endurskoða þurfi innflytjendalög.

Tillagan um að taka lögin til endanlegrar afgreiðslu var felld með 53 atkvæðum gegn 46. Hún mætti mikilli andstöðu flokksbræðra Bush, sem töldu að með þeim væri verið að verðlauna fólk fyrir lögbrot.

Lögin hefðu gert hluta af milljónum ólöglegra innflytjenda í Bandaríkjunum kleyft, að uppfylldum ákveðnum skilyrðum, að sækja um ríkisborgarrétt. Þau hefðu einnig opnað möguleikann fyrir tilvonandi innflytjendur að sækja um tímabundið atvinnuleyfi. Þá hefðu þau hert landamæraeftirlit og komið á nýju kerfi til að finna ólöglega innflytjendur á vinnustöðum.